Sri Gurustotram

|| śrī gurustōttram ||

akhaṇḍamaṇḍalākāraṁ vyāptaṁ yēna carācaram .

tatpadaṁ darśitaṁ yēna tasmai śrīguravē namaḥ .. 1..

ajñānatimirāndhasya jñānāṁjanaśalākayā .

cakṣurunmīlitaṁ yēna tasmai śrīguravē namaḥ .. 2..

gururbrahmā gururviṣṇuḥ gururdēvō mahēśvaraḥ .

gururēva paraṁ brahma tasmai śrīguravē namaḥ .. 3..

sthāvaraṁ jaṁgamaṁ vyāptaṁ yatkiñcitsacarācaram .

tatpadaṁ darśitaṁ yēna tasmai śrīguravē namaḥ .. 4..

cinmayaṁ vyāpi yatsarvaṁ trailōkyaṁ sacarācaram .

tatpadaṁ darśitaṁ yēna tasmai śrīguravē namaḥ .. 5..

sarvaśrutiśirōratnavirājitapadāmbujaḥ .

vēdāntāmbujasūryō yaḥ tasmai śrīguravē namaḥ .. 6..

caitanyaśśāśvataśśāntaḥ vyōmātītō niraṁjanaḥ .

bindunādakalātītaḥ tasmai śrīguravē namaḥ .. 7..

jñānaśaktisamārūḍhaḥ tattvamālāvibhūṣitaḥ .

bhuktimuktipradātā ca tasmai śrīguravē namaḥ .. 8..

anēkajanmasamprāptakarmabandhavidāhinē .

ātmajñānapradānēna tasmai śrīguravē namaḥ .. 9..

śōṣaṇaṁ bhavasindhōśca jñāpanaṁ sārasampadaḥ .

gurōḥ pādōdakaṁ samyak tasmai śrīguravē namaḥ .. 10..

na gurōradhikaṁ tattvaṁ na gurōradhikaṁ tapaḥ .

tattvajñānāt paraṁ nāsti tasmai śrīguravē namaḥ .. 11..

mannāthaḥ śrījagannāthaḥ madguruḥ śrījagadguruḥ .

madātmā sarvabhūtātmā tasmai śrīguravē namaḥ .. 12..

gururādiranādiśca guruḥ paramadaivatam .

gurōḥ parataraṁ nāsti tasmai śrīguravē namaḥ .. 13..

tvamēva mātā ca pitā tvamēva . tvamēva bandhuśca sakhā tvamēva

tvamēva vidyā draviṇaṁ tvamēva . tvamēva sarvaṁ mama dēvadēva .. 14..

| iti śrī gurustottram  |